De wiizen uut 't óósten
Ööit weunden der drie wiize mannen in Iran.
Ze keken nao de sterren en wisten daor alles van.
Op een nacht zaogen ze der êên an de lucht staon,
waovoor as ze de boeken der op nao mosten slaon.
Ze zaogen dat er een kleinen geboren was in 't westen,
maor dan echt nii zoemao den êêsten den besten.
De Koning van de wèreld volgens udder boeken.
Dus besloten ze om dem gauw te gaon bezoeken
En die móóie stèrre bleek udder oek te verhaolen
da ze mao 't beste schóöne kado's zouen gaon aolen.
Dus èn zij een ööp goud èn mirre èn wierook gekocht,
udder kamelen gezaodeld èn begonnen an den tocht.
Da nam toch a gauw een paor maonden in beslag,
wan zij reisden s' nachts èn sliepen dan overdag.
Wan overdag kun je natuurlijk gêên stèrre zien staon.
Dus bèn je verplicht om 's nachts op reis te gaon.
Deur eiken nacht maor achter die stèrre an te gaon,
kwaomen zij eindelijk op een dag in Jeruzalem an.
Zij bèn dao dan koning Herodes gaon bezoeken
èn deejen dao toen udder verhaol uut de doeken.
Den ouwe koning raokten echt êêlemao van slag,
omdat ie in da kind een mogelijke concurent zag.
Ie sprak tegen de wiizen wel êêle móóie woorden,
mao maokten a plannen om da kind te vermoorden.
De Joden aoden in de profeten kunnen ontdekken,
dat de wiizen nao Bethlehem mosten vertrekken.
Zij bèn dao geraokt op minder dan twêê daogen
èn waoren verbaosd over wat a zij daor zaogen.
De Koning van de wèreld was een êêl klein kind,
mee een eenvoudige moeder èn een simpele vint.
Maor ondanks het ontbreken van praol èn pracht,
zaogen zij dit is 't kind wao de wèreld op wacht.
Wat a zij allemao zeien was echt nii te verstaon,
mao zij bèn dao voo da kind in anbidding gegaon.
Omda zij mekaore toch nii goed konnen verstaon,
bèn zij toen mao wee gauw op uus an gegaon.
De ménsen èn die mannen laoter naomen gegeven
èn zij bèn as de drie koningen voort bluven leven.
Wil je het echte verhaol der nog es op naolezen,
daovoo moe je in de Biibel bii Mattheüs wezen.
'K èn soms wel es iets uut mijn duum gezogen,
maor ontouw dat 't voornaomste nii is geleogen.
Leen de Jonge, dialect Land van Axel
't Vaarke
Een squadron meeuwen landt op het dek van de koekoek in mit vee
geschufel in geschreeuw nae mekaore zoekt aalke meêuwe de beste plekke
op. Het is 'n leven as 'n óórdeel, da's raek, Dat duur een paer menuten in
Piet oort 'r wakker van. Ie bluuf nog 'n stuitje laahe, ma jao, je kan eihenlijk
Aflevering 182 winter 2013
45
