m
48 m
Aflevering 182 winter 2013
Momenten uut m'n HBS-tied
Naer de HBS
Dat was nog niejt vanzelfsprekend dat ik naer de HBS zou göö. Ik kon wel
goewd lêre, in ik hao aok wel al op de bieles ezete, mar eigelijk was de HBS
veels te haoge egrepe, vonge ze thuus. 'Da 's niks voor uus soort ménsen,
de Ulo is haoge genoeg', zei moewder. Mééster Van den Tol van de zesde
klasse heit nog héél wat motte soebatte, voordat 't zöö vaorde was. Eigelijk
heit m'n ouwere zuster de deurslag egeve, want heur heit net zolange
ezaonikt toet 't mocht. Heur kon zelf aok goewd lêêre in hao best deur wille
lêre, mar moewder heit dêêr gelieke een stokkie voor estoke. 'Meisjes die
in Menheersen göö lêre, dat wore allemaele drellen. Géén spraeke van!' hao
ze ezeid in dêêr was toe de kouse mit of 'eweest. Ze kon thuusbluve, om te
heipene in 't huushouwen.
Naer de HBS dus, in september 1958. In juni hao ik toelaetingsexamen edae.
Dat durende twêê daegen. De rekenopgaeve hè 'k pas 'elee nog in 'n ouwe
dööze evonge.
In de zeumervakansie was ik al op de fiets over 't Dirklanse Sas na
Menheersen eweest om spullen te kaopene voor m'n nieuwe carrière: 'n
schoolagenda, 'n echt degelijken van Tjeenk Willink, 'n saoi dienk eigelijk,
die 'k laeter op'esierd hè mit plae'ies uut De Lach. Die agenda hè 'k nog. Aok
'n tekendööze in tube'ies plakkaatvèrve in tekenpennen moste an'eschaft
wore. Bie Jordaan hao 'k 'n gymshirt ekocht: blaeuw mit 'n witte kraege in
manchetten, 't Was knap ruim, 't was op de groei an'eschaft. 'n Zwarten
gymbroek hao m'n zuster al voor m'n enaoid, wel mit 'n bee'ie lange pupen,
mar die ko' je oprolle. Schriften in pennen die ko j' wel bie Gert van Koppen
in Ouddurp kaope. Schoolboeken kon je hure uut 't boekefons. Omdat ik
toe toch in Menheersen was, nog mar een paer ron'ies om 't schoolgebouw
eree, een indrukwekkend gebouw. Ik hao d'r zin in!
Pasfoto 1959
Op de HBS
As ik noe langs 't gebouw rieje in nae de raemen kieke, komme d'r nog
steeds beelden boven van leraeren, lokalen in lessen die dêêr egeve wiere,
leuke in vervelende. Of 't leuk was hieng dichte van de leraer of leraeres of,
in natuurlijk aok van je interesse. Je zat in een klasse met lëêrlingen van 't
héle eiland in niejt allêêne mit personen van je eige durp. Ik zat in de klasse
mit die van vaorde kwamme, van de kop van Goerêê t/m Dirksland in die
van Nieuwe Tonge toet de Plaete. Die van rond Menheersen, Sommelsdiek in
Stad zatte in 'n aore klasse. Mit de jongens hao m'n wel saeme gymnastiek,
want gemengd gym was toe niejt an de orde. In de pauzes hieng ie wat
buten rond of dee je 'n ron'ie deur de Hobbemastraete. As 't slecht weer
was bleef ie binnen. Je hao aok tussenuren. Dan gieng ie naer den diek of
naer Kruik. In zö'n tussenure hè 'k saeme mit Henk van Putten uut Melissant
'n kêêr pasfoto's laete maeke bie Rotsma in de Hobbemastraete. Die
pasfoto hê 'k nog. Wat een kop mit haer hao 'k toe nog! Ik mot toe 'n jaer of
vêêrtiejne eweest hè. Wëêr Henk op 'n gegeve moment ebleve is, dat weet ik
niejt. 'k Hê 'n nóóit mêêr ezieje; z'n pasfoto hè 'k nog wel.
Ielk uure 'n aor vak
Ja, dat was wel ofwisselend: ielk uure niejt alêêne 'n aor vak, mar aok 'n aor
lokaal in 'n aore lêraer. Niejt alle vakken vong ik even leuk. Mit de exacte
